ഡല്ഹി പബ്ലിക് സ്കൂള് കെട്ടിടത്തില് നിന്നു വീണ നാലുവയസുകാരി മലയാളി പെണ്കുട്ടി മരിച്ചു.
ബെംഗളൂരു കമ്മനഹള്ളി ചേലക്കരയിലുള്ള ഡല്ഹി പബ്ലിക് സ്കൂള് കെട്ടിടത്തില് നിന്നു വീണ നാലുവയസുകാരി മരിച്ചു. കോട്ടയം മണിമല സ്വദേശി ജിന്റോ ടോമി ജോസഫിന്റെ മകള് ജിയന്ന ആന് ജിജോ ആണ് മരിച്ചത്. ഡിപിഎസ്സിലെ പ്രീ സ്കൂൾ വിദ്യാർത്ഥിനി ആയിരുന്നു ജിയന്ന ആൻ ജിറ്റോ. ചൊവ്വാഴ്ച വൈകിട്ടോടെയാണ് കുഞ്ഞിന് അപകടം പറ്റിയത്. തുടര്ന്ന് കുഞ്ഞ് വെന്റിലേറ്ററിലായിരുന്നു.
കുഞ്ഞിന് അപകടം പറ്റിയതെങ്ങനെ എന്നതിലിലെ ദുരൂഹത തുടരുകയാണ്. കുഞ്ഞിന്റെ സുരക്ഷ ഉറപ്പാക്കാതിരുന്ന സ്കൂള് അധികൃതർ സംഭവം ഒതുക്കിത്തീർക്കാൻ ശ്രമിക്കുകയാണെന്നാണ് കുഞ്ഞിന്റെ അച്ഛനമ്മമാർ ആരോപിക്കുന്നു. ചൊവ്വാഴ്ച വൈകിട്ടോടെ കുഞ്ഞ് ഛർദ്ദിച്ചുവെന്ന് പറഞ്ഞാണ് സ്കൂള് അധികൃതര് മാതാപിതാക്കളെ വിളിച്ചു വരുത്തിയത്. തൊട്ടടുത്ത ചെറിയ ആശുപത്രിയിലാണ് കുഞ്ഞിനെ ആദ്യം കൊണ്ടുപോയത്. അവിടെയെത്തിയപ്പോൾ കുഞ്ഞിന് ഗുരുതര പരിക്കുണ്ടെന്ന് കണ്ട അച്ഛനമ്മമാരാണ് ബെംഗളുരു ഹെബ്ബാളിലെ ആസ്റ്റർ മെഡിസിറ്റിയിലേക്ക് കുട്ടിയെ മാറ്റിയത്. വിദഗ്ധ ചികിത്സ നൽകാൻ എത്തിച്ചപ്പോഴേക്കും കുഞ്ഞിന് മസ്തിഷ്ക മരണം സംഭവിച്ചിരുന്നു.
കുഞ്ഞ് വീണ് പരുക്കു പറ്റി എന്ന് പറഞ്ഞ സ്കൂള് അധികൃതര് പിന്നീട് കുട്ടി ടെറസ്സില് നിന്നു വീണു എന്ന് അറിയിക്കുകയായിരുന്നു. ഇത്ര ചെറിയ കുഞ്ഞ് ഒറ്റയ്ക്ക് എങ്ങനെ ടെറസിൽ എത്തി എന്നതും അവിടെ നിന്ന് താഴേയ്ക്ക് വീണു എന്നതും ദുരൂഹമാണ്. കുഞ്ഞിനെ നോക്കാൻ ചുമതല ഉണ്ടായിരുന്ന ആയ മോശമായി പെരുമാറിയിരുന്നുവെന്ന് അച്ഛനമ്മമാർ പറയുന്നു. സ്കൂളിലെ സിസിടിവി ദൃശ്യങ്ങൾ സ്കൂള് അധികൃതർ ഡിലീറ്റ് ചെയ്യാൻ ശ്രമിച്ചെന്നും പല ദൃശ്യങ്ങളും ലഭ്യമല്ലെന്നും അച്ഛനമ്മമാർ ആരോപിക്കുന്നു. സംഭവത്തെ തുടര്ന്ന് മലയാളിയായ പ്രിൻസിപ്പൽ തോമസ് ചെറിയാൻ ഒളിവിലാണ്. ചെല്ലക്കര പോലീസ് കേസെടുത്ത് അന്വേഷണം ആരംഭിച്ചു.