ഏപ്രിൽ ഒന്നു മുതൽ പുതിയ ദേശീയ തൊഴിൽ ചട്ടം നിലവിൽ വരും.

Print Friendly, PDF & Email

മൂന്നു കാര്‍ഷിക ബില്ലുകള്‍ നടപ്പിലാക്കുന്നതിനു പിന്നാലെ രാജ്യത്തെ തൊഴില്‍ മേഖലയില്‍ സമൂല പരിവര്‍ത്തനം വരുത്തുന്ന ദേശിയ തൊഴിൽ കോഡ് ഏപ്രില്‍ ഒന്നുമുതല്‍ നിലവില്‍ വരും. കഴിഞ്ഞ വർഷമാണ് മൂന്ന് ലേബർ കോഡുകൾ ലോക്‌സഭ പാസാക്കുന്നത്. ഇൻഡസ്ട്രിയൽ റിലേഷൻസ് കോഡ് ബിൽ, കോഡ് ഓൺ സോഷ്യൽ സെക്യൂരിറ്റി ബിൽ, ഒക്കുപേഷണൽ സേഫ്റ്റി, ഹെൽത്ത് ആന്റ് വർക്കിം​ഗ് കണ്ടീഷൻസ് കോഡ് ബിൽ എന്നിവയാണ് അത്.

രാജ്യത്തെ തൊഴിലാളികളെ സംരക്ഷിക്കുന്നതിതിന്റെ ഭാഗമായി രാജ്യമൊട്ടാകെ ഒരേ മിനിമം കൂലി ഉറപ്പു നല്‍കുന്നതും സ്ഥാപനങ്ങൾക്ക് കീഴിലല്ലാതെ സ്വതന്ത്രരായി ജോലി ചെയ്യുന്നവരുടെ ക്ഷേമവും ലക്ഷ്യം വച്ചുകൊണ്ടുള്ളതുമാണ് പുതിയ തൊഴില്‍ ബില്ലുകൾ എന്ന് കേന്ദ്ര സര്‍ക്കാര്‍ അവകാശപ്പെടുന്നുണ്ടെങ്കിലും ബില്ലിൽ ഒളിച്ചിരിക്കുന്ന അപകടങ്ങൾ തൊഴില്‍ മേഖലയില്‍ അസ്വസ്തത പടര്‍ത്തിയിരിക്കുകയാണ്. കര്‍ഷകര്‍ക്കു പിന്നാലെ രാജ്യത്തെ തൊവിലാളികളേയും സമര പാതയിലേക്ക് തള്ളിവിടന്നതാണ് പുതിയ ബില്ലുകള്‍.

300ൽ താഴെ തൊഴിലാളികളുള്ള സ്ഥാപനത്തിന്റെ ഉടമയ്ക്ക് സേവന, വേതന, ഷിഫ്റ്റ് വ്യവസ്ഥകൾ നിശ്ചയിക്കാനും മുൻകൂർ അനുമതിയില്ലാതെ അടച്ചുപൂട്ടാനും അവകാശം നൽകുന്ന ഇൻഡസ്ട്രിയൽ റിലേഷൻസ് കോഡ് ബില്‍-2020 ആണ് അതില്‍ പ്രധാന ബില്ല്. നിലവിൽ 100ൽ താഴെ തൊഴിലാളികളുള്ള സ്ഥാപനങ്ങൾക്കാണിത് ഈ നിയമം ബാധകം. ഈ പരിധിയാണ് നിലവിൽ 300 ലേക്ക് ഉയർത്തിയിരിക്കുന്നത്. അതോടെ വലിയൊരു വിഭാഗം തൊഴിലാളികളുടെ തൊഴില്‍ സുരക്ഷിതത്വമാണ് ഇല്ലാതാവുക. ഈ ബില്‍ പ്രകാരം ഒരു സ്ഥാപനത്തിലെ 50 ശതമാനം ജീവനക്കാർ ഒരുമിച്ച് അവധിയെടുത്താൽ അത് സ്‌ട്രൈക്കായാണ് കണക്കാക്കുന്നത്. മറ്റൊന്ന് സമരം നടത്താനുള്ള ജീവനക്കാരുടെ അവകാശമാണ്. 60 ദിവസത്തെ മുൻകൂർ നോട്ടിസ് നൽകാതെ ജീവനക്കാർക്ക് സമരം നടത്താൻ പാടില്ല.

രണ്ടാമത്തെ ബില്‍ ആയ സോഷ്യൽ സെക്യൂരിറ്റി ബിൽ 2020 ല്‍ അസംഘടിത, ഓൺലൈൻ, സ്വയം തൊഴിലുകാർക്കായി 40 കോടി രൂപയുടെ സാമൂഹ്യ സുരക്ഷാ ഫണ്ട് ബില്ലിൽ ഉൾപ്പെടുത്തിയിട്ടുണ്ട്. ഇത്തരം തൊഴിലാളികൾക്ക് ഡിസബിളിറ്റി ഇൻഷുറൻസ്, പ്രൊവിഡന്റ് ഫണ്ട്, ആരോഗ്യ പ്രസവ ആനുകൂല്യങ്ങൾ എന്നിവയും ബില്ലിൽ പരാമർശിക്കുന്നു.

മൂന്നാമത്തെ ബില്‍ ആയ തൊഴിൽ സുരക്ഷാ കോഡ് ബിൽ- 2020 ല്‍ വനിതാ തൊഴിലാളികൾക്ക് പുരുഷന്മാരുടേത് പോലെ തുല്യമായ വേതനം, നൈറ്റ് ഷിഫ്റ്റിൽ ജോലി ചെയ്യാനുള്ള സൗകര്യം എന്നിവ ഈ ബില്ലിൽ ഉൾപ്പെടുത്തിയിട്ടുണ്ട്. ഇതര സംസ്ഥാന തൊഴിലാളി ആക്ട് 1979 നൊപ്പം മറ്റ് 13 ആക്ടുകൾ കൂടി കൂട്ടിച്ചേർത്തിട്ടുണ്ട് ഈ ബില്ലിൽ.

സ്വന്തം സംസ്ഥാനത്ത് നിന്ന് മറ്റ് സംസ്ഥാനത്ത് ജോലിക്കായി പോയ, 18,000 രൂപ പ്രതിമാസ ശമ്പളമുള്ള വ്യക്തിയെന്ന നിലയിലാണ് ഇതര സംസ്ഥാന തൊഴിലാളികളെ ബില്ലിൽ നിർവചിക്കുന്നത്. കരാർ തൊഴിലാളിക്കും സ്ഥിരം തൊഴിലാളികൾക്ക് തുല്യമായ ഗ്രാറ്റിവിറ്റി, അവധി സേവന വേതന ആനുകൂല്യങ്ങൾ എന്നിവയാണ് ബില്ലിലെ മറ്റ് സുപ്രധാന നിർദേശങ്ങൾ.

തൊഴിലാളികൾക്കും തൊഴിൽ ദാതാക്കൾക്കും ഒരേ പോലെ ഗുണം ചെയ്യുന്നതാണ് പുതിയ ബില്ലുകളെന്ന് കേന്ദ്രസര്‍ക്കാര്‍ പറയുന്നുണ്ടെങ്കിലും പുതിയലേബർ കോഡില്‍ തൊഴിൽ ദാതാക്കൾക്ക് നൽകിയ ചില അവകാശങ്ങൾ തൊഴിലാളികൾക്ക് കടുത്ത പ്രതിസന്ധി സൃഷ്ടിക്കും. 300ൽ താഴെ തൊഴിലാളികളുള്ള സ്ഥാപനത്തിന്റെ ഉടമയ്ക്ക് സേവന, വേതന, ഷിഫ്റ്റ് വ്യവസ്ഥകൾ നിശ്ചയിക്കാനും മുൻകൂർ അനുമതിയില്ലാതെ അടച്ചുപൂട്ടാനും അവകാശം നൽകുന്ന ബില്ല് നിലവിൽ വന്നാൽ തൊഴിലാളി സമൂഹത്തിൽ അത് സൃഷ്ടക്കുക അരക്ഷിതാവസ്ഥ ആയിരിക്കും.

പ്രതിഷേധം സംഘടിപ്പിക്കാനുള്ള തൊഴിലാളികളുടെ അവകാശമാണ് പതിയ ബില്ലുകള്‍ നടപ്പിലാകുന്നതോടെ ഇല്ലാതാവുക. ഒരു സ്ഥാപനത്തിൽ സ്‌ട്രൈക്ക് നടത്തണമെങ്കിൽ 60 ദിവസം മുമ്പേ നോട്ടിസ് നൽകണം. മാത്രമല്ല, നാഷണൽ ഇൻഡസ്ട്രിയൽ ട്രൈബ്യൂണൽ വേളയിൽ സ്‌ട്രൈക്ക് നടത്തുവാനും പാടില്ല. ഈ പ്രതിസന്ധികളെല്ലാം മറികടന്ന് ഒരു സമരം സംഘടിപ്പിച്ച് പ്രതിഷേധിക്കുക എന്നത് ദുഷ്‌കരമാകും.

ജലം, വൈദ്യുതി, ടെലിഫോൺ അടക്കമുള്ള പൊതുവിതരണ സംവിധാനങ്ങളിലെ തൊഴിലാളികൾക്ക് ആറ് ആഴ്ച മുമ്പ് നോട്ടിസ് നൽകാതെ സമരം നടത്താൻ സാധിക്കില്ല. നോട്ടിസ് നൽകി 14 ദിവസമാകുന്നതിന് മുമ്പും പ്രതിഷേധ സമരങ്ങൾ സംഘടിപ്പിക്കാൻ സാധിക്കില്ല. ഐആർ കോഡ് വരുന്നതോടെ എല്ലാ ഇൻഡസ്ട്രിയൽ എസ്റ്റാബ്ലിഷ്‌മെന്റ്‌സിനും ഈ നിയമം ബാധകമാകും. പതിറ്റാണ്ടുകള്‍ നീണ്ട സമരങ്ങളിലൂടെ തൊഴിലാളികള്‍ നേടിയെടുത്ത പല അവകാശങ്ങളും ഇല്ലാതാക്കുന്നതാണ് പുതിയ ബില്ലുകള്‍.

  •  
  •  
  •  
  •  
  •  
  •  
  •