എറണാകുളം ജില്ലയിലെ വ്യാപാര സ്ഥാപനങ്ങള് ഇന്ന് തുറന്ന് പ്രവര്ത്തിക്കും – സംയുക്ത വ്യാപാരി സംഘടനകള്.
എറണാകുളം ജില്ലയിലെ വ്യാപാര സ്ഥാപനങ്ങള് ഇന്ന് തുറന്ന് പ്രവര്ത്തിക്കുമെന്ന് സംയുക്ത വ്യാപാരി സംഘടനകള് അറിയിച്ചു. തൊഴിലാളി സമരത്തിന്റെ പേരില് സംസ്ഥാനത്തെ ചെറുകിട ഇടത്തരം വ്യാപാര സ്ഥാപനങ്ങളെ നിര്ബന്ധമായി അടപ്പിച്ചപ്പോള്, കുത്തക മുതലാളിമാരായ യൂസഫലിയുടെ ലുലുമാളും, അംബാനിയുടെ റിലയന്സ് സൂപ്പര്മാര്ക്കറ്റ് ശൃംഖലയും നിര്ബാധം തുറന്ന് പ്രവര്ത്തിക്കുകയും അവരെ അടപ്പിക്കുവാന് വിപ്ളവ പാര്ട്ടികളുടെ തൊഴിലാളി സംഘടനകള് തയ്യാറാകാതിരിക്കുകയും ചെയ്യുന്ന സാഹചര്യത്തില് തങ്ങള് മാത്രം കടകള് അടച്ചിടുന്നതില് അര്ത്ഥമില്ലന്ന് അവർ കുറ്റപ്പെടുത്തി. അതിനാല്, ഉപജീവനം കണ്ടെത്തുന്നതിനുള്ള പൗരന്റെ മൗലികാവകാശത്തെ കുത്തക മുതലാളിമാര്ക്ക് അടിയറവ് വയ്ക്കില്ലെന്നും നാളെ ജില്ലയിലെ മുഴുവന് സ്ഥാപനങ്ങളും തുറന്ന് പ്രവര്ത്തിക്കുമെന്നും കേരള വ്യാപാരി വ്യവസായി ഏകോപന സമിതി ജില്ലാ പ്രസിഡന്റ് പിസി ജേക്കബ് അറിയിച്ചു. കേരള മര്ച്ചന്റ് ചേംബര് ഓഫ് കോമേഴ്സ്, ഓള് കേരള ഡിസ്ട്രിബ്യൂട്ടേഴ്സ് അസ്സോസിയേഷന്, കേരള ഹോട്ടല് ആന്റ് റസ്റ്റോറന്റ്സ് അസ്സോസിയേഷന്, ബേക്കേഴ്സ് അസ്സോസിയേഷന് തുടങ്ങിയ സംഘടനകളും കേരള വ്യാപാരി വ്യവസായി ഏകോപന സമിതിയുടെ നിലപാടിനൊപ്പമാണ്.
