ഭീമാകാരമായ ഉൽക്കാശില ആഘാതം ജീവൻ്റെ ആദ്യകാല പരിണാമത്തിൽ നിർണായക പങ്കുവഹിച്ചെന്ന് പുതിയ പഠനം.

3.26 ബില്യൺ വർഷങ്ങൾക്ക് മുമ്പ് സംഭവിച്ച ഭീമാകാരമായ ഉൽക്കാശില ആഘാതം ഭൂമിയിലെ ജീവൻ്റെ ആദ്യകാല പരിണാമത്തിൽ നിർണായക പങ്ക് വഹിച്ചിരിക്കാം എന്ന് പുതിയ പഠനം. പ്രൊസീഡിംഗ്സ് ഓഫ് ദി നാഷണൽ അക്കാദമി ഓഫ് സയൻസസിൽ പ്രസിദ്ധീകരിച്ച പുതിയ പഠന റിപ്പോര്‍ട്ടിലാണ് പുതിയ വെളിപ്പെടുത്തല്‍. ഹാർവാർഡ് യൂണിവേഴ്‌സിറ്റി ജിയോളജിസ്റ്റ് നഡ്‌ജ ഡ്രാബൻ്റെ നേതൃത്വത്തിൽ നടത്തിയ പഠനം സൂചിപ്പിക്കുന്നത് ഈ ദുരന്ത സംഭവം പ്രാകൃത സൂക്ഷ്മാണുക്കൾക്ക് ഒരു “ഭീമൻ വളം ബോംബ്” ആയി പ്രവർത്തിച്ചു എന്നാണ്.

ദക്ഷിണാഫ്രിക്കയിലെ ബാർബർട്ടൺ ഗ്രീൻസ്റ്റോൺ ബെൽറ്റിലെ പുരാതന പാറകളിൽ നിന്നുള്ള തെളിവുകൾ ആണ് പുതിയ നിഗമനത്തിലേക്ക് ശാസ്ത്ര ലോകത്തെ കൊണ്ടുചെന്നെത്തിച്ചത്. ഉത്ക്കാ പതനം മൂലമുണ്ടായ നാശത്തിനിടയിലും, ജീവിതം അതിവേഗം വീണ്ടെടുത്തു അഭിവൃദ്ധി പ്രാപിക്കുവാന്‍ സഹായിച്ചുവെന്നും പഠനം വെളിപ്പെടുത്തുന്നു.

ദിനോസറുകളുടെ വംശനാശത്തിന് കാരണമായതിനേക്കാൾ 50-200 മടങ്ങ് വലിപ്പമുള്ള ഉൽക്കാശിലയാണ് പാലിയോ ആർക്കിയൻ കാലഘട്ടത്തിൽ ഭൂമിയിലേക്ക് പതിച്ചത്. അക്കാലത്ത്, ഭൂമി പ്രാഥമികമായി വെള്ളത്താൽ മൂടപ്പെട്ടിരുന്നു, ഭൂഖണ്ഡാന്തര ഭൂപ്രദേശം കുറവായിരുന്നു, അന്തരീക്ഷത്തിലോ സമുദ്രങ്ങളിലോ ഓക്സിജൻ ഇല്ലായിരുന്നു. പ്രസ്തുത ഉൽക്കാ പതനത്തിന്‍റെ ആഘാതം പാറയെ ബാഷ്പീകരിക്കുകയും ഒരു ആഗോള പൊടിപടലത്തെ സൃഷ്ടിക്കുകയും വലിയ സുനാമികൾക്ക് കാരണമാവുകയും സമുദ്രജലത്തിന്‍റെ മുകളിലെ പാളികളെ തിളപ്പിക്കുകയും ചെയ്തു.

എന്നിരുന്നാലും, കാർബണേഷ്യസ് കോണ്‌ട്രൈറ്റായി തരംതിരിക്കപ്പെട്ട ഉൽക്കാശില, ഭൂതലത്തില്‍ വലിയ അളവിൽ ഫോസ്ഫറസ് വിതരണം ചെയ്തു – സൂക്ഷ്മജീവികളുടെ ജീവിതത്തിന് നിർണായകമായ പോഷകം ആയിരുന്നു ഈ ഫോസ്ഫറസ്. കൂടാതെ, ആഘാതം സൃഷ്ടിച്ച സുനാമികൾ ഇരുമ്പ് സമ്പുഷ്ടമായ സമുദ്രാഴത്തിലുള്ള ജലത്തെ ആഴം കുറഞ്ഞ വെള്ളവുമായി കലർത്തി, പല തരത്തിലുള്ള സൂക്ഷ്മാണുക്കൾക്കു വളരുവാനുള്ള അനുയോജ്യമായ സാഹചര്യങ്ങൾ സൃഷ്ടിച്ചു. “ഈ ആഘാതങ്ങൾ ഭീമാകാരമായ വളം ബോംബുകളാണെന്ന് സങ്കൽപ്പിക്കുക,” ഡ്രാബൺ വിശദീകരിക്കുന്നു.

ഉല്‍ക്കാ പതനങ്ങള്‍ ജീവന് വിനാശകരമായി ഇരിക്കുമ്പോൾ തന്നെ, അക്കാലത്ത് ഉണ്ടായിരുന്ന സൂക്ഷ്മാണുക്കളുടെ ലാളിത്യവും പൊരുത്തപ്പെടുത്തലും മാറിയ പരിസ്ഥിതിയിൽ നിന്ന് പ്രയോജനം നേടി വളരുവാന്‍ അവരെ സഹായിച്ചു.

എല്ലാ വലിയ ഉൽക്കാശില ആഘാതങ്ങളും സാർവത്രികമായി ജീവന് വിനാശകരമാണെന്ന ധാരണയെ വെല്ലുവിളിക്കുന്നതാണ് പഠനത്തിൻ്റെ കണ്ടെത്തലുകൾ. പകരം, ചില വ്യവസ്ഥകളിൽ, അത്തരം സംഭവങ്ങൾ ഭൂമിയുടെ ആദ്യകാല ജൈവ പരിണാമത്തിൽ അവശ്യ പോഷകങ്ങൾ നൽകുകയും ആദിമ ജീവജാലങ്ങൾക്ക് പുതിയ ആവാസ വ്യവസ്ഥകൾ സൃഷ്ടിക്കുകയും ചെയ്യുന്നതിൽ ഗുണകരമായ പങ്ക് വഹിക്കുമെന്ന് അവർ അഭിപ്രായപ്പെടുന്നു.

ഈ ഗവേഷണം ഭൂമിയുടെ പുരാതന ഭൂതകാലത്തിലേക്ക് വെളിച്ചം വീശുക മാത്രമല്ല, നമ്മുടെ ഗ്രഹത്തിലും ഒരുപക്ഷേ പ്രപഞ്ചത്തിലെ മറ്റിടങ്ങളിലും അങ്ങേയറ്റത്തെ അവസ്ഥകളിൽ സൂക്ഷ്മജീവികളുടെ അഥവ ജീവൻ്റെ സാധ്യതയെ കുറിച്ചുള്ള സൂചനകളാണ് നല്‍കുന്നത്.