വഖഫ് ഭൂമി തിരിച്ചുപിടിച്ചു നല്‍കണമെന്ന് കേരള വഖഫ് സംരക്ഷണ സമിതി.

മുനമ്പത്തെ വിവാദ ഭൂമിയിൽ താമസിക്കുന്നവരുടെ സ്വത്തുമായി ബന്ധപ്പെട്ട പ്രശ്‌നങ്ങൾ പരിഹരിക്കുമെന്ന് അധികൃതർ പറഞ്ഞുകൊണ്ടേയിരിക്കുന്ന അവസരത്തില്‍ സംസ്ഥാന സർക്കാർ വഖഫ് ഭൂമി തിരിച്ചുപിടിച്ച് ഫറോക്ക് കോളേജ് അധികൃതർക്ക് കൈമാറി യഥാർത്ഥ ആവശ്യത്തിന് വിനിയോഗിക്കണമെന്ന് കേരള വഖഫ് സംരക്ഷണ സമിതി ആവശ്യപ്പെട്ടു.

വഖഫ് നിയമപ്രകാരം വഖഫ് ഭൂമി പൂർണ്ണമായും നിയമവിരുദ്ധമായി മൂന്നാം കക്ഷിക്ക് വിറ്റഴിച്ച ഫറോക്ക് കോളേജ് അധികാരികളാണ് മുഴുവൻ പ്രശ്നത്തിലും പ്രധാന തെറ്റ് വരുത്തിയതെന്ന് ബുധനാഴ്ച വാർത്താ സമ്മേളനത്തില്‍ സമിതി വ്യക്തമാക്കി.

വഖഫ് ഭൂമി ദുരുപയോഗം ചെയ്താൽ വഖഫ് നിയമപ്രകാരം അതിൻ്റെ ഉടമസ്ഥാവകാശം സ്വയമേവ സംസ്ഥാന സ്ഥാപനമായ വഖഫ് ബോർഡിൽ നിക്ഷിപ്തമാകുമെന്നും അതിനാൽ ഭൂമി തിരിച്ചുപിടിക്കാനുള്ള പൂർണ അധികാരം സംസ്ഥാന സർക്കാരിനാണെന്നും സമിതി അംഗങ്ങൾ പറഞ്ഞു.

“മുനമ്പം കേസിൽ, വിദ്യാഭ്യാസ ആവശ്യങ്ങൾക്കായി ഭൂമി കൈമാറിയതാണ്. ഫറോക്ക് കോളേജ് അധികൃതർ ആണ് അനധികൃതമായി ഭൂമി മൂന്നാം കക്ഷിക്ക് വിറ്റത്. ഇത്തരം ഭൂമികൾ വഖഫ് ബോർഡ് തിരിച്ചുപിടിക്കണമെന്ന് വഖഫ് നിയമത്തിലെ 32-ാം വകുപ്പ് വ്യക്തമായി പറയുന്നുണ്ട്. ഭൂമി തിരിച്ചുപിടിച്ചുകഴിഞ്ഞാൽ, അത് യഥാർത്ഥ ആവശ്യത്തിന് ഉപയോഗിക്കണമെന്ന് സമിതി കൺവീനർ അഡ്വ.മുജീബ് റഹ്മാൻ പറഞ്ഞു.

മുനമ്പം ഭൂമിയിലെ താമസക്കാരെ കുറിച്ച് ചോദിച്ചപ്പോൾ ഫറോക്ക് കോളേജ് അധികൃതരും ചില നിക്ഷിപ്ത താൽപര്യമുള്ള മാഫിയകളും ചേർന്നാണ് നിവാസികളെ വഞ്ചിച്ചതാതെന്ന് സമിതി വ്യക്തമാക്കി. മാനുഷിക പരിഗണനയോടെ വിഷയം പരിഹരിക്കാനുള്ള ഉത്തരവാദിത്തം സംസ്ഥാനത്തിനുണ്ടെന്നും റഹ്മാൻ പറഞ്ഞു.

“സംസ്ഥാന സർക്കാർ താമസക്കാരെ മാറ്റിപ്പാർപ്പിക്കണം, ഇതിനാവശ്യമായ തുക ഫറോക്ക് കോളേജ് അധികൃതരിൽ നിന്ന് നഷ്ടപരിഹാരമായി ഈടാക്കണം. നിലവിൽ സഭാ മേധാവികളുടെ പ്രചാരണം ജനങ്ങളെ തെറ്റിദ്ധരിപ്പിക്കുന്നതാണ്. മുനമ്പത്തെ 404 ഏക്കർ വഖഫ് ഭൂമി പോലുമല്ലെന്ന് ചിലർ പറയുന്നു, അത് പൂർണ്ണമായും തെറ്റാണ്,” മുസ്ലീം വ്യക്തിനിയമ വിദഗ്ദനായ അഡ്വ എം എം അലിയാർ വാർത്താസമ്മേളനത്തിൽ പറഞ്ഞു. കേരള ഹൈക്കോടതി ഡിവിഷൻ ബെഞ്ച് സംസ്ഥാന സർക്കാർ ഉത്തരവ് റദ്ദാക്കിയതാണെന്ന് സമിതി അംഗങ്ങൾ വ്യക്തമാക്കി. 2022 ഡിസംബർ 12-ന് ഹൈക്കോടതിയാണ് വിധി പുറപ്പെടുവിച്ചത്. ഇത്തരമൊരു വിധി ഇപ്പോഴും നിലനിൽക്കുമ്പോൾ, മുനമ്പത്ത് തർക്കഭൂമി വഫ്ഖ് ഭൂമിയല്ലെന്ന പ്രതിപക്ഷ നേതാവ് വി ഡി സതീശൻ ഐക്യദാർഢ്യ യോഗത്തിൽ കഴിഞ്ഞ ദിവസം നടത്തിയ പ്രസ്താവന തൊഴിൽപരമായി അഭിഭാഷകൻ കൂടിയായ പ്രതിപക്ഷ നേതാവ് ക്രിസ്ത്യൻ സഭകളെ പ്രീതിപ്പെടുത്താൻ ലക്ഷ്യമിട്ട് വ്യാജ പ്രചരണം നടത്തുന്നതിന്‍റെ ഭാഗമാണ്. ഇത് വോട്ട് ബാങ്ക് രാഷ്ട്രീയത്തിൻ്റെ ഭാഗമാണെന്നും റഹ്മാൻ പറഞ്ഞു.

1902ൽ തിരുവിതാംകൂർ രാജാവ് മുനമ്പം വസ്തു അബ്ദുൾ സത്താർ മൂസ ഹാജി സേട്ടിന് പാട്ടത്തിന് നൽകിയെന്ന ക്രിസ്ത്യൻ സഭാ മേധാവികളുടെ സമീപകാല വാദങ്ങൾ ചൂണ്ടിക്കാണിച്ചപ്പോൾ, അത് പട്ടയമല്ലെന്നും ഗിഫ്റ്റ് ഡീഡാണെന്നും അലിയാർ വ്യക്തമാക്കി. മുൻ രേഖകളും 2022 ഡിസംബർ 12-ന് ഹൈക്കോടതി പുറപ്പെടുവിച്ച വിധിയിലും മുമ്പത്തെ എല്ലാ വിധികളിലും അങ്ങനെയാണ് പറഞ്ഞിട്ടുള്ളത്.

സേട്ടാണ് വഖഫ് ഭൂമിയാക്കി വിദ്യാഭ്യാസ ആവശ്യങ്ങൾക്കായി ഫറോക്ക് കോളേജ് അധികൃതർക്ക് കൈമാറിയത്. ഒരു വഖഫ് സ്വത്തില്‍ മറ്റ് ഇടപാടുകള്‍ നടത്താൻ കഴിയില്ല, ”അദ്ദേഹം കൂട്ടിച്ചേർത്തു: “ഇത് വഖഫ് ഭൂമിയല്ലെന്ന് സമരക്കാർക്ക് തോന്നുന്നുവെങ്കിൽ, അവർ (മുനമ്പത്തെ ഇപ്പോഴത്തെ സമരക്കാർ) എന്തുകൊണ്ട് ഹൈക്കോടതിയെയോ സുപ്രീം കോടതിയെയോ സമീപിച്ചില്ല,” റഹ്മാൻ പറഞ്ഞു. വഖഫ് നിയമത്തിലെ വ്യവസ്ഥകൾ പ്രകാരം സംസ്ഥാന സർക്കാർ മുനമ്പം പ്രശ്നം പരിഹരിക്കണമെന്ന് സമിതി ആവശ്യപ്പെട്ടു.