‘പുതിയ ആണവ കരാര്‍ രണ്ട് മാസത്തിനകം തയ്യാറാക്കണം’. ഇറാന് അന്ത്യശാസനം നൽകി ട്രംപ്.

പുതിയ ആണവ കരാറിനായുള്ള ചർച്ചകൾ നടത്തി പുതിയ കരാറിലെത്തുന്നതിന് രണ്ട് മാസത്തെ സമയപരിധി നിശ്ചയിച്ച് യുഎസ് പ്രസിഡന്റ് ഡൊണാൾഡ് ട്രംപ് ഇറാന്റെ പരമോന്നത നേതാവ് ആയത്തുള്ള അലി ഖമേനിക്ക് കത്ത് അയച്ചു. നയതന്ത്ര പ്രമേയത്തിനുള്ള തന്റെ മുൻഗണന ട്രംപ് ഊന്നിപ്പറഞ്ഞു, എന്നാൽ ചർച്ചകൾ പരാജയപ്പെട്ടാൽ ബദൽ നടപടികളെക്കുറിച്ച് സൂചന നൽകിയുള്ള ട്രം‍പിന്‍റെ കത്ത് ഇറാനുള്ള അന്ത്യ ശാസനമായി വിലയിരുത്തപ്പെടുന്നു. ചർച്ചകൾക്ക് പിന്നിലെ ഉദ്ദേശ്യങ്ങളെക്കുറിച്ച് സംശയം പ്രകടിപ്പിച്ച ഇറാൻ ഇതുവരെ ഔദ്യോഗികമായി പ്രതികരിച്ചിട്ടില്ല.

2022 ൽ റഷ്യ ഉക്രെയ്ൻ ആക്രമിച്ചതിനുശേഷം ആണവയുദ്ധ ഭീഷണി ലോകത്ത് വർദ്ധിച്ചുവരുകയാണ്. ആണവായുധങ്ങളടക്കമുള്ള ഈ കൂട്ട നശീകരണ ആയുധങ്ങൾ വൻതോതിൽ സജ്ജീകരിച്ചിരിക്കുന്ന രാജ്യങ്ങൾ തമ്മിലുള്ള വർദ്ധിച്ചുവരുന്ന സംഘർഷങ്ങൾ ലോകത്തെ അതീവ ജാഗ്രതയിലാക്കിയിരിക്കുന്നു. ലോകത്ത് ഒമ്പത് രാജ്യങ്ങൾ മാത്രമേ ആണവായുധങ്ങൾ കൈവശം വച്ചിട്ടുള്ളൂ. എന്നാൽ ഈ രാജ്യങ്ങൾ ഏകദേശം 13,000 ആണവബോംബുകള്‍ ശേഖരിച്ചുവച്ചിട്ടുണ്ടെന്ന് കണക്കാക്കപ്പെടുന്നു. ഇവതന്നെ മനുഷ്യരാശിക്ക് നാശം വിതയ്ക്കാൻ പര്യാപ്തമായതിനാല്‍ ഇറാന്‍ പോലുള്ള മത തീവ്ര രാഷ്ട്ര ങ്ങള്‍ക്കൂടി ആണവായുധങ്ങള്‍ കൈവശപ്പെടുത്തുന്നത് ലോത്തിന് കൂടുതൽ ആപത്കരമായിരിക്കുമെന്നാണ് വിലയിരുത്തപ്പെടുന്നത്.