രാമനഗര ജില്ല ഇനിമുതല്‍ ബെംഗളൂരു സൗത്ത് ഡിസ്ട്രിക്‍‍.

രാമനഗര ജില്ലയുടെ പേര് ‘ബെംഗളൂരു സൗത്ത്’ എന്ന് പുനർനാമകരണം ചെയ്യാൻ കർണാടക സർക്കാർ തീരുമാനിച്ചു. മുഖ്യമന്ത്രി സിദ്ധരാമയ്യയുടെ നേതൃത്വത്തിൽ വെള്ളിയാഴ്ച ചേർന്ന മന്ത്രിസഭാ യോഗത്തിലാണ് തീരുമാനം. ബെംഗളൂരുവിൽ നിന്ന് 50 കിലോമീറ്റർ അകലെ സ്ഥിതി ചെയ്യുന്ന രാമനഗര ജില്ലയിൽ രാമനഗര, മഗഡി, കനകപുര, ചന്നപട്ടണ, ഹരോഹള്ളി താലൂക്കുകൾ ഉൾപ്പെടുന്നു. ജനങ്ങളുടെ ആവശ്യം പരിഗണിച്ചാണ് ജില്ലയുടെ പേര് മാറ്റാൻ തീരുമാനിച്ചതെന്ന് നിയമ, പാർലമെൻ്ററി കാര്യ മന്ത്രി എച്ച് കെ പാട്ടീൽ പറഞ്ഞു.

“രാമനഗര ജില്ലയുടെ പേര് ബെംഗളൂരു സൗത്ത് എന്ന് പുനർനാമകരണം ചെയ്യാൻ ഞങ്ങൾ തീരുമാനിച്ചു….അത് അവിടത്തെ ജനങ്ങളുടെ ആവശ്യത്തെ അടിസ്ഥാനമാക്കിയാണ്. റവന്യൂ വകുപ്പ് നടപടികൾ ആരംഭിക്കും,” പാട്ടീൽ പറഞ്ഞു. “ജില്ലയുടെ പേര് മാത്രമേ മാറൂ, ബാക്കിയുള്ളവ അതേപടി തുടരും,” യോഗത്തിന് ശേഷം അദ്ദേഹം മാധ്യമപ്രവർത്തകരോട് പറഞ്ഞു.

അയൽ ജില്ലയെ ‘ബെംഗളൂരു സൗത്ത്’ എന്ന് പുനർനാമകരണം ചെയ്യാനുള്ള നിർദ്ദേശം അടുത്തിടെ ഉയർന്നിരുന്നു. കഴിഞ്ഞ വർഷം ഒക്ടോബറിൽ ഉപമുഖ്യമന്ത്രി ഡി കെ ശിവകുമാറിൻ്റെ നേതൃത്വത്തിലുള്ള പ്രതിനിധി സംഘം മുഖ്യമന്ത്രിയെ കാണുകയും പേര്മാറ്റത്തിനായി മെമ്മോറാണ്ടം സമർപ്പിക്കുകയും ചെയ്തു. “ആരംഭം മുതൽ ഈ പ്രദേശത്തെ ജനങ്ങൾ തങ്ങളെ ബെംഗളൂരുവിൻ്റെ ഭാഗമാണെന്ന് കരുതുന്നുണ്ടെന്നും അതിനാൽ ജില്ലയെ ബെംഗളൂരു സൗത്ത് ജില്ല എന്ന് പുനർനാമകരണം ചെയ്യണമെന്നും ഡികെ ശിവകുമാര്‍ അന്ന് ആവശ്യപ്പെട്ടിരുന്നു. ഉപമുഖ്യമന്ത്രി ഡികെ ശിവകുമാറിൻ്റെ സ്വന്തം ജില്ലയാണ് രാമനഗര.

എന്നാൽ കർണാടക മുൻ മുഖ്യമന്ത്രിയും കേന്ദ്രമന്ത്രിയുമായ എച്ച്‌ഡി കുമാരസ്വാമി പേരുമാറ്റത്തെ എതിര്‍ക്കുകയാണ്. രാമനഗരയിലെ റിയൽ എസ്റ്റേറ്റ് അവസരങ്ങൾ ചൂഷണം ചെയ്യാനാണ് ഈ നിർദ്ദേശം ലക്ഷ്യമിടുന്നതെന്ന് കുമാരസ്വാമി പറഞ്ഞു. താൻ വീണ്ടും മുഖ്യമന്ത്രിയാകുമ്പോൾ പദ്ധതി തിരുത്തുമെന്ന് ജെഡിഎസ് നേതാവ് പറഞ്ഞു. 2007 ഓഗസ്റ്റിൽ രാമനഗര ജില്ല വിഭജിക്കപ്പെട്ടപ്പോൾ ജെഡി(എസ്)-ബിജെപി സഖ്യത്തിൻ്റെ മുഖ്യമന്ത്രിയായിരുന്നു കുമാരസ്വാമി.